اک خواب؛ ڈٹھی میں اک حور مرے ول پیلاں پاندی آوے

اِک خواب

ڈِٹھی میں اِک حُور مِرے وَل پَیلاں پاندی آوے

اِک نظر مستانی جس دی لَکھ بُھلیکھے پاوے

ایڈی سوہنی چھیل چھبیلی جھاتی پاندے ڈرئیے

بدّل اوہدیاں زُلفاں اگے آکھن پانی بھرئیے

قد اوہدا رب اپنی ہتھیں بوٹا لایا ہویا اے

رنگ اوہدا جیوں میدے وِچ سیندھور ملایا ہویا اے

حُسن، جمال تے رُوپ اوہدے دا کوئی نہ حد بنّاں

اُس دیاں نازک ہتھاں دے وچ سونے دا اِک چھنّاں

اوہ چھنّاں اُس آن کے میرے ہوٹھاں نال لگایا

ہابڑ ہابڑ پِین لگا میں وِرہیاں دا ترہایا

ٹھنڈا ٹھار پھلُودا سنگھوں لنگھدا جائے اَگّے

دُدھ وراچھاں میریاں وِچوں سجّے کھبّے وگّے

دُدھ پھلُودے چاڑھے مینوں نشے شراباں والے

اینے چِر وِچ ہور وی حُوراں کھڑیاں آل دوالے

اوہناں نے کجھ ہور سوغاتاں میرے لئی منگوائیاں

قسماں قسم مربّے، میوے، حلوے تے مٹھیائیاں

مُڑ میں ایناں وگ تگ کھادا کُڑتا ڈھڈ نہ کَجّے

پاٹن ہاکا پیٹ، ندیدی اَکھ مِری نہ رَجّے

میری ایہو نیت سی پئی کدی نہ ایتھوں ہلیے

حُوراں آکھن آؤ جی ہُن سیر کرن نُوں چلیے

اِک تھاں مینوں شہد دی اوہناں وگدی نہر وکھائی

جیویں جیویں ویکھاں ودھدی جائے اکھیاں دی رُشنائی

کاراں اَتے جہازاں والے بُھل گئے سب جھوٹے

قوس قزح وِچ بہا کے مینوں حُوراں دتّے ہُوٹے

سرہیوں جیھیاں سوہنیاں ناراں دِسن ہر ہر پاسے

پتلے لک، بسنتی چُنیاں ہوٹھاں اُپر ہاسے

ہر کوئی مینوں جی جی بولے آکھے راج دُلارا

میرے نال پروہنیاں ورگا اوہناں دا وَرتارا

میں پُچھیا نی حورو اَڑیو کاہنوں کِھڑ کِھڑ ہَسّو

میری ایڈی خدمت خاطر، وِچلی گَل تے دَسّو

آکھن لگیاں بیبا ایڈا پردہ کاہنوں پاناں

جنت وچ الیکشن ہونائے ووٹ اسانوں پاناں

انور مسعود