جمعہ بازار
سبزی مِرچ مصالحے سارے جمعہ بزارے ویکھے
کیسے کیسے عجب نظارے جمعہ بزارے ویکھے
سارے بند بزار تے کُھلا ایہہ بزار نرالا
مسجد دا ہمسایہ میلا چوکھی رونق والا
ہُم ہُما کے آیا ایتھے سارا آل دوالہ
ابا، چاچا، پُھپھا، امی، باجی، خالہ
لوک، ولیتی دیسی سارے، جمعہ بزارے ویکھے
کیسے کیسے عجب نظارے جمعہ بزارے ویکھے
رنگ برنگی کاراں والیاں لگیاں ہوئیاں پالاں
ہر کوئی ایتھے میرے وانگوں ڈُبا وِچ خیالاں
کیہڑے چیز خریداں، ایتھوں کیہڑا سودا ٹالاں
اوتھے چوکھا بھیڑ بھڑکّا جیہڑی تھانویں دالاں
مٹی، دھُوڑ، غبار، غبارے، جمعہ بزارے ویکھے
کیسے کیسے عجب نظارے جمعہ بزارے ویکھے
کیہڑی شے نئیں ویکھی ایتھے ویکھے نے اَدھوانے
اِس بزارے وِکدے ویکھے اَساں مکئی دے دانے
وَن سوّنے ویکھے ایتھے کمبل لیف سرھانے
کاراں دے وِچ ڈکّے ہوئے ڈِٹّّھے بال ایانے
ہسدے، روندے، تے کُرلاندے، بال وچارے ویکھے
کیسے کیسے عجب نظارے جمعہ بزارے ویکھے
لنڈے دا سامان خریدن لوکی ڈردے ڈردے
ہَنڈے وَرتے کوٹ، سویٹر چُکدے ویہندے دھردے
فیشن نویں نبھاون دے پئے سستے چارے کردے
گھر دا پردہ رکھن لئی پئے لَین پُرانے پردے
اوورکوٹ، جُراباں، شالاں، سودے سارے ویکھے
کیسے کیسے عجب نظارے جمعہ بزارے ویکھے
نوِیں نِرالی جاپی جس نے جو آواز لگائی
کہے املوکاں والا بھائی کِشمِش وِکنے آئی
مونگ پَھلّی نوں آکھے کوئی پِستے دی بھرجائی
گنّے وَیچن والا کُوکے لُٹی گئی مٹھیائی
برفی دی آواز سُنی تے شکرپارے ویکھے
کیسے کیسے عجب نظارے جمعہ بزارے ویکھے
کوئی جوس اناراں والا نوش پئیا فرماندا اے
کوئی مرغی ذبح کرا کے تھیلے وِچ پئیا پاندا اے
کوئی گاہگ ہزاراں دا قالین خریدی جاندا اے
خالی کِھیسے والا کوئی اَکھیاں نوں ترساندا اے
ماتڑ، ساتھی کئی وچارے، جمعہ بزارے ویکھے
کیسے کیسے عجب نظارے جمعہ بزارے ویکھے
شامِیں سستے وَیچن لگ پئے سودے وَیچن والے
ایہو موقع ویکھ رہے سَن کئی خریدن والے
ایدوں بعد ملنگاں وانگوں بیٹھے بیٹھن والے
سودے والی خالی پیٹی بال کے سَیکن والے
رات، ہنیرا، بھانبھڑ، تارے، جمعہ بزارے ویکھے
کیسے کیسے عجب نظارے جمعہ بزارے ویکھے
انور مسعود
