پہلے ہنجواں دے ناں دل دی مٹی گونا
فیر دعاواں منگ منگ پیار دا بوٹا بونا
گرمی وچ کملاوے ٹھنڈیاں ہاواں بھرنا
سردی وچ اکّھاں دا تتا پانی پَونا
پھل پک جاوے تے لے جاون ڈاھڈے لوکی
پُھلّاں دی جے فصل اُگاویں تاں میں منّاں
کنڈے آپے اُگنے جد توں پُھل نوں بونا
اکّھاں نوٹے تے سرمایہ لُٹ جاندا اے
عاشق لئ اے اوکھا راتاں نوں وی سونا
نیوِیاں نظراں کر کے اوہ تے لنگ جاندا اے
چھڈ دے اکّھاں بھر کے راہواں وچ کھلونا
جاندے ویلے اَگے ودھ کے ڈَک لیندوں ناں
فیدہ کیہ ہن سجن کلیاں بہہ کے رونا
اَج دے عاشق مرزے وانگوں پُج پیندے نیں
اینہاں نوں نہیں چنگا لگدا ہینیا ہونا
ہُن تے چائیں چائیں عارفؔ چھالاں مارے
اوکھا ہُندا مُڑ کے دل دا بُوھا ڈھونا
جاوید عارف
