دل والا روگ نئیں کسے نوں سنائیں دا
اپنیاں سوچاں وچ آپ مر جائی دا
دے کے نذرانے سرکار نوں منایا اے
پڑھ کے نمازاں تے غفار نوں منایا اے
توں کی جانے کیویں رُٹھے یار نوں منائی دا
دل والا روگ نئیں کسے نوں سنائیں دا
ماہی رُس جاوے تے جہان رُس جاندا اے
ٹُٹ جاندے مان پلے کُجھ وی نہ رہندا اے
پھردا اے بندہ جیویں ماریا خدائی دا
دل والا روگ نئیں کسے نوں سنائیں دا
چھڈ منظورؔ تیرا دنیا اچ کم کی
اوہ وی ٹُر گیا جدے دم نال دم سی
موت کولوں بوہتا دکھ یار دی جدائی دا
دل والا روگ نئیں کسے نوں سنائیں دا
دل والا روگ نئیں کسے نوں سنائیں دا
اپنیاں سوچاں وچ آپ مر جائی دا
منظور جھلا
سائیں اختر حسین کی آواز میں سنئیے
