پوٹھواری گیت: مینہ کیہ کراں (میں کے کراں)

پنجابی پوٹھواری پوٹھوہاری پہاڑی شاعری

(مینہ کیہ کراں (میں کے کراں

مھاڑا ناہ کتنے پور دَل نی 

مھاڑے پھَٹ نہ مُڑی مُڑی چھَل نی

مھاڑا گھر ناہ چِیرے والا 

مھاڑا ہِیرا گلے نی مالھا 

مھاڑا سَکھن مسَکھڑا بیہڑا 

گھر نہیں رونق تََکسی کیہڑا 

میں ہاں سُول کسے نے جَھلنی 

مھاڑے اندر اَگ پئی بَلنی 

رات دہاڑی تَپنیاں دُھونیاں 

مائے! میں نہ کََتنی پُونیاں 

تََند جے بانہہ تاں تَند نہیں پَینی 

پُونیں یاد مِکی نہیں رہنی 

اَکھیاں وِچ کوئی مُورت فِرنی 

نی! ہِک سوہنی صُورت فِرنی 

نی! کوئی اَچھنا ہَسنا ہَسنا 

نی! مُڑ گََچھنا نَسنا نَسنا 

نی! میں اُدھرے رہنیاں تَکنی 

کُن پیا دِسنا، دَس نہ سَکنی 

کَت نہ سَکنی، بول نہ سَکنی 

دِلے نِیاں گھَنڈیاں کھولھ نہ سَکنی 

اندر سُولاں کھُبھنیاں دُونیاں 

مائے! میں نہ کَتنی پُونیاں 

ودھاتا سنگھ تیر