پڑھی نماز تے نیاز نہ سِکھیا تیریاں کِس کَم پڑھیاں نمازاں
علم پڑھیا تے عمل نہ کیتا تیریاں کِس کَم کیتیاں وازاں
نہ گھر ڈِٹھا نہ گھر والا ڈِٹَھا تیریاں کِس کَم دِتیاں نیازاں
بُلھے شاہ پتہ تَد لگ سی جدوں چِڑی پَھسی ہتھ بازاں
اِک دِن ماہی دے گھر جانا نی جِندے کوئی چَج سِکھ لے
آس دا رنگلا چرخہ ڈاھ لے نیک عملاں دا تند کوئی پا لے
ایہو تند کم تیرے کم آؤنا نی جِندے کوئی چَج سِکھ لے
پریم دے رنگ وچ چولا رنگ لے پیار ماہی دا رب کولوں منگ لے
تیرا فرض اے کاج بنانا نی جِندے کوئی چَج سِکھ لے
ساہواں توں تسبیح دا کم لے نام سجن دا انج ہر دم لے
ایتھے مڑ مڑ کے نئیں آؤنا نی جِندے کوئی چَج سِکھ لے
کسے سہیلی دا لڑ پھڑ لے یار مناؤنے دا گُر کوئی پھڑ لے
ایہہ ویلا ہتھ نئیں آؤنا نی جِندے کوئی چَج سِکھ لے
