آ کاگا تینوں چُوریاں پاواں کدی ساڈے وی بیٹھ بنیرے
دے پیغام کوئی سجناں والا وے میں شگن مناواں تیرے
آ کے بیٹھ بنیرے ساڈے شاید آ جانڑ ساجن میرے
اڈیاں چک یار فریداؔ راہ تکاں میں شام سویرے
(بابا فرید الدین مسعود گنج شکرؒ)
ایویں بول نہ بنیرے اُتے کانواں سجناں نئیں آونڑا
دل میرے نوں وڈ وڈ کھاویں کانوں ایویں بولیاں پاویں
چپ کر جا میں تینوں سمجھاواں، سجناں نئیں آونڑا
او نہ آوندے عُمراں ساری جہڑے جاندے مار اڈاری
میں مکدی گل مکاواں، سجناں نئیں آونڑا
نہ تُو بولی بول بنیرے مُڑ جا ترلے پاواں تیرے
نہ چُوٹھیاں دے صداواں، سجناں نئیں آونڑا
ہوکیاں دے وس مینوں پاکے بیٹھا ایں جتھے ڈیرے لاکے
خورے کہڑیاں نے او تھاواں، سجنڑاں نئیں آونڑا
کر کے قول نبھاندا کوئی نئیں جا کے واپس آوندا کوئی نئیں
تینوں لکھ دی اک سناواں، سجناں نئیں آونڑا
سوچاں دے وچ دل گھبرایا صادق مڑ وطنی نئیں آیا
آونڑا ہووے تے دسے سرناواں، سجناں نئیں آونڑا
ایس ایم صادق
(شیخ محمد صادق حسین)
