تتی رو رو واٹ نہاراں
وے سانول موڑ مہاراں
جیں کارن سو سختی جھاگی
پھِراں ڈوہاگی، دیس براگی
جیندیں ڈیکھاں سانول ساگی
یار بروچل وسم سولڑا
جیندے سانگے مانیم تھلڑا
خان پنلڑا! نہ کر کلہڑا
توں سنگ چانگے چاراں
جیں ڈینہہ یار اساں تو نکھڑے
میندھی روپ ڈکھائے پھِکڑے
ڈسدے سرخی دے رنگ بکھڑے
وگھریاں کجل دیاں دھاراں
من من منتاں پیر مناواں
ملاں گول تعویذ لکھاواں
سڈ سڈ جوسی فالاں پاواں
کردی سون ہزاراں
خواجہ پیر دے ڈیساں چھنّے
ایہے ڈینہہ اتھائیں بھنّے
جیندیاں سبھ دل کیتیاں منّے
دسّم سدا گھر باراں
بندڑے نال نہ کرسیں مندڑا
تو نیں کوجھا کملا گندڑا
لٹک سہائیں صحن سوہندڑا
پوں پوں توں جِند واراں
چھوڑ فرید نہ یار دا دامن
جیٔں جی کیتا جڑ کر کامن
ڈوہاں جہاناں ساڈا امامن
کینویں دلوں دساراں
وے سانول موڑ مہاراں
تتی رو رو واٹ نہاراں
خواجہ غلام فرید کوریجہ
