مساگ ملیندی دا گزر گیا ڈینہ سارا

مساگ ملیندی دا گزر گیا ڈِینہ سارا

شِنگار کریندی دا گزر گیا ڈِینہ سارا

کجلا پائم، سُرخی لائم، کیتم یار وسارا

کاگ اُڈیندی عمر وہانی، آیا نہ یار پیارا

روہ ڈونگر تے جنگل بیلا رولئم شوق آوارا

ہک دم عیش دی سیج نہ مانڑم بخت نہ ڈِتڑم وارا

پڑھ بسم اللہ گھولئم سر کوں، چاتم عشق اجارا

رانجھن مینڈا میں رانجھن دی، روز ازل دا کارا

ہجر فریدا لمبی لائی، جل گیئم مفت وچارا

خواجہ غلام فرید کوریجہ