پاک وطن دے وسنیکا توں قومی شان ودھاندا جا
اتحاد تیرا جے محکم اے شان نال لڈیاں پاندا جا
مرکز نوں پکیاں کر کے توں پکے پیر جماندا جا
تهلاں وچ ویلاں لا کے تے کلراں نوں باغ بناندا جا
اتحاد گڑہتی تیری اے غیراں نوں چهاتی لاندا جا
پاک وطن دے وسنیکا توں قومی شان ودھاندا جا
اس تیرے قومی جذبے نیں ایہہ تیرے کم سنوارے نیں
ایسے ای جذبے اگے وی کئی ڈبدے بیڑے تارے نیں
اتحاد تیرے دی برکت تهیں اج تیرے وارے نیارے نیں
دیساں تے دُهماں پئیاں نے عرشاں تے ہسدے تارے نیں
توں اٹهدا بہندا رڑدا وی ایہہ قومی گانے گاندا جا
پاک وطن دے وسنیکا توں قومی شان ودھاندا جا
توں آون والیاں نسلاں لئی ہر دکھ نوں سر تے جهرناں اے
اپنے پہاڑاں دی جهولی نوں دریاواں نال بهرناں اے
توں زندگی لئی سی مرنےلئی اج جیون دے لئی مرناں اے
نسلاں نیں تیرے کهریاں توں سارا کجھ حاصل کرناں اے
توں پاک وطن دی چهاتی تے جنت دے نقشے پاندا جا
پاک وطن دے وسنیکا توں قومی شان ودھاندا جا
توں دیس اپنے دی چهاتی تے اوہ لا پهلواری پهلاں دی
کل دیساں والے پئے آکهن جس نوں پهلکاری پهلاں دی
لالا دیساں والے قلماں کردے توں ایہہ دهرتی ساری پهلاں دی
باغے دے بوہے پهلاں دے تے چادر دیواری پهلاں دی
توں جوگیؔ وطن پیارے نوں پهلاں دے نال سجاندا جا
پاک وطن دے وسنیکا توں شان ودھاندا جا
جوگی جہلمی
