ایہہ سوچاں سوچ کے دل میرا ہے پارہ پارہ ہو جاندا
جے ہر تھاں تے موجود ہیں تُوں پھر کیوں نہیں نظارہ ہو جاندا
گذران میری کی پچھنایں ایہہ گل کوئی پچھنے والی اے
دونین جدوں رو لیندے نے دو دن اے گذارہ ہو جاندا
موجاں وچ موجاں لیاں نہ آپار گیا پلکارے وچ
کیہ تیرے اگے کجھ دور آیا جے دور کنارہ ہو جاندا
میں ساقی اپنی توبہ دے اک پَل وِچ ٹوٹے کر دیندا
جے نظراں نظراں وِچ تیرا اک وار اشارہ ہو جاندا
تُوں لاش میری تے آ جاندوں اس وچ کی تیرا جاندا سی
تُوں نیکیوں دامن بھر لیندوں میں زندہ دوبارہ ہو جاندا
کیوں کعبے تے بُت خانے دی پابندی جوگیؔ گل پالاں
میں جتھے متھا ٹیک دیاں ہے تیرا دوارہ ہو جاندا
جوگی جہلمی
