پنجابی لوک گیت
گوری دے سنہری جھمکے، جدوں تُردی ہلارے کھاندے
اکھیاں ءچ رب وسدا، اوہدے نخرے جھلے نہ جاندے
مہندی والے ہتھ رس گئے، جدوں گھول کے ننان نے لائی
پھکا پھکا رنگ چڑھیا، بوٹی اک نہ سواد دی پائی
وینیاں گلابی گوریاں، اوہدے گجرے جان تڑفاندے
گوری دے سنہری جھمکے، جدوں تردی ہلارے کھاندے
اکھیاں ءچ رب وسدا، اوہدے نخرے جھلے نہ جاندے
گرمی دی رُت آ گئی، روپ نکھریا دون سوایا
چٹھی دی تریخ لنگھ گئی، ویری ماہی نہ اجے گھر آیا
بک بک موتی گُند کے، ٹنگے کلیاں نال پراندے
گوری دے سنہری جھمکے، جدوں تردی ہلارے کھاندے
اکھیاں ءچ رب وسدا، اوہدے نخرے جھلے نہ جاندے
تتراں دے کھنبھ ورگی، گل کڑتی سنوا کے پائی
موڈھیاں تے رکھ ڈوریا، اوہدی اڈدی جوانی آئی
تردی مروڑے مار کے، اوہدے انگ نے کہانیاں پاندے
گوری دے سنہری جھمکے، جدوں تردی ہلارے کھاندے
اکھیاں ءچ رب وسدا، اوہدے نخرے جھلے نہ جاندے
کِکراں نوں پھُل لگ گئے، تینوں کُجھ نہ لگے مُٹیارے
ویکھ کے سہی نورُپوری، میہنے جگ نے اوسنوں مارے
گھُنڈ وچ اگ بلدی، اوہدے نین دسنوں شرماندے
گوری دے سنہری جھمکے، جدوں تردی ہلارے کھاندے
اکھیاں ءچ رب وسدا، اوہدے نخرے جھلے نہ جاندے
نند لال نورپوری
