بہتا پیار نئیں چنگا ہوندا دل نوں روگ لگا جاندا اے
فیر دل دوجے دے وس ہو کے سارا جیون کھا جاندا اے
وقت سد ا نئیں اک جیہا رہندا سارے روپ وِکھا جاندا اے
کدی تاں بوجھ دلاں دا بن دا کدی ایہہ دل نوں بھا جاندا اے
روپ سدا البیلے اس دے سبھ توں وکھرا پیار وی اس دا
رب جد دل دا محرم بنڑدا سارے یار مکاجاندا اے
منزل وی فیر اس نوں ملدی جیہٹرا اس دے قابل ہوندا
راہواں دے وچ جاگن والا چھیکڑ راہواں پا جاندا اے
وکھر ے وکھرے روپ نے سبھ دے وکھرا سبھ دا ورتن
کوئی درد دا دارو بنڑدا، کوئی درد ودھا جاندا اے
راتوں رات کدی نئیں لبھدا، دل جیہا سچا موتی
اس موتی دا شوق کدی تے ایویں عمراں کھا جاندا اے
آپنی ذات نوں قلعہ بنا کے خُش پھردے ساں بہتے
کون اے جیہڑا کندھاں ڈھا کے اندر جھوک وسا جاندا اے
پردے وِ چ وِی رہندا لیکن مینوں ہر تھاں نظر وی آوے
جو وی اس دی طلب چ نکلے اس نوں روپ وکھا جاندا اے
چھپدا لُکدا رہندا لیکن ہر احساس چ شامل ہوندا
جِد وی نیڑتا منگیے اس دی لُوں لُوں وچ سما جا ندا اے
عشق دے سارے روپ اولے رہن نہ دیندا کجھ وی پلے
لے کے شاہاں ورگیاں شاناں ہتھ کشکول پھڑا جاندا اے
باغ بہشتاں چین نہ پاوے جس نوں عشق دی اگ بلاوے
سدھراں نال تے اوہی سڑدا جیہڑا عشق نوں پا جاندا اے
بوہتے طور تے سڑدے ویکھے بوہتے سدھراں کردے ویکھے
لیکن جیہڑا نُور اے رب دا، اوہ معراج نوں پا جاندا اے
شازیہ اکبر
