اس عشق دے پینڈے ڈاڈھے نے
لے جاویں کسے نوں نال کُڑے
مل جاوے جے کوئی نسلی تے
لج دیوے گا او پال کُڑے
ایتھے کم نئیں کچیاں گھڑیاں دا
ایڈا سوکھا نئیں لنگھ پار جانا
وچ لہراں وی بہہ جاندے نے
تاری ترن نہ جان سُکھیری توں
کر چھڈو گی بے حال کُڑے
جِند وختاں وچ نہ پاویں توں
اس عشق توں جان بچاویں توں
ایہہ روگی کر کے ماردا اے
ایدھے ولاں وچ نہ آویں توں
تیرے چُوڑے وی ٹُٹ جاون گے
کُھل جاون گے تیرے وال کُڑے
مت دیواں گا، جے من جاویں
ایتھے ہر کوئی روپ وٹاؤندا اے
ایتھے کر کے گوڑیاں گلاں وی
ہر کوئی لُٹ لے جاؤندا اے
ڈاروں وچھڑ کے کونج کُرلاندی اے
نہ ٹُر وکھری توں چال کُڑے
توں ہیر سیال صداویں گی
رُل تھلاں دے وِچ جاویں گی
نہ چاہندیاں وی توں چاہویں گی
دم دم نال یار بلاویں گی
رکھ مان توں اپنی عزت دا
نہ بنیں توں ہیر سیال کُڑے
عرفان بزمی
No comments:
Post a Comment
Note: only a member of this blog may post a comment.