اکھیاں کرن سوال نی مائے
اپنی شکل وکھال نی مائے
دُکھاں ڈیرے لا لے ہن تے
سُکھاں دا اے کال نی مائے
تیرے باہجوں سارے نے پر
پچھدا کوئی نہ حال نی مائے
بے مطلب اس پیار تیرے دی
دیندی پھراں مثال نی مائے
پُت تیرا بیمار ہے کد دا
کرے گا کون خیال نی مائے
تاہنگاں وچ حیاتی پہ گئی
چھڈ گئی ایں کس حال نی مائے
روگ اولڑے جان پئے کھاون
توں سیں کی کمال نی مائے
تینوں ویکھیاں اجر سی ملدا
رب دا روپ جمال نی مائے
اُجڑی بستی دل میرے دی
کون سُنے ہن حال نی مائے
دل کہندا لے جا ہن تے
قبراں دے وچ نال نی مائے
عرفان بزمی
No comments:
Post a Comment
Note: only a member of this blog may post a comment.