لیندے لیندے لھہ جانی اے مہندی وقت دے ہتھاں دی
رہندے رہندے رہ جانی اے یاد سنہری سنگتاں دی
اج وی ویکھو کھول کے رکھدی بوہا گھر دے ویہڑے دا
ماں نوں کدرے خبر نہ پیندی شہر نوں ٹر گئے پُتراں دی
شالا تتی واء نا لگے اس دھرتی دے باغاں نوں
روز دعاواں دیندی پئی اے دھرتی پنج دریاواں دی
روح دے اندر ہے اکلاپا ، ذات دا سُنجا ویہڑا اے
کونجاں وانگوں اندر اڈدی تانگھ امیداں سدراں دی
ساہ ساہ نال میں سانبھی رکھاں تالے لا لابکسے نوں
ایہدے وچ اے قیمتی پونجی خطاں تے تصویراں دی
نام مِرا ایمان تے میرا ہور تعارف یاد رہوے
عشق تے ضد دی پکی واں میں لوکو کڑی بلوچاں دی
ایمان قیصرانی
No comments:
Post a Comment
Note: only a member of this blog may post a comment.