لاحاصل پندھ
لیکھ لیکے اکوریے ہتھیں دے نال
پلکیں دے در لہا کے
جے خشک اکھیں دی ریت چھنڈکوں
مکان دی قید توں نکل کے
زمان وسعت تیں دید ماروں
پچھو تیں ڈیکھوں تاں کیا نظردے
کئی ہجر سالیں دے رکھے منظر
وصال لمحیں دیاں چور جھلکیاں
تے روح دی روہی دی گرم ریتیں
دے وچ تڑپدیاں ہویاں محبتاں
بدن دے بھردے ہوئے ٹھیڑھ اندرو
عجب کلہیپے دے دربھ نسردے
سکیں دے سیک اچ سواہ سپنے
ہتھیں توں جھنڑیاں ہویاں دعائیں
فلک توں خالی ول آیاں دھاہیں
نہ ہتھیں واگ اے
نہ پیریں بھوئیں ہے
نہ سر تیں چھاں اے
طویل بے سمت پندھ اجائے
جنہیں دا حاصل فقط تھکیڑا
ہے رائیگانی تے بے نشانی
ایہا حیاتی دی ہے کہانی
عباس برمانی
No comments:
Post a Comment
Note: only a member of this blog may post a comment.