تمام ڈکھ اے
ان الانسان لفی خسر
سمے دا خالق
سمے دا مالک
سمے دی سوگند چا تے آہدے
جو بندہ ہر حال تروٹ وِچ ہے
(پر ہے اوہو جیڑہا کھوٹ وچ ہے)
جو حق الیندے، یقین وچ ہے
صبر دی تلقین وی کریندے
(ہمیش او تاں نفع کمیندے )
او اہلِ دانش! اے سوجھوانڑو
عقل دی بیڑی دے ناخداؤ
ہاں تے ہتھ رکھ تے اے ڈساؤ
جو گھن تے آدم توں اج دے دم تئیں
چوکھے ناں ہن تریخ دے وچ
جو دار چڑھ تے وی سچ الا گئین
جو زہر پی تے وی حق ڈسا گئین
او کتنے لوک ان؟
جو سر توں پیریں تئیں زخم کھاتے
بال، نینگر، بھِرا کوہاتے
صبر کریندن
صبر دی تلقین وی کریندن
میڈے خیال اچ تاں
گانڑویں ہن
جو انگلیں اتے گنڑیج سگدن
قسم سمے دی جو
بندہ بے شک تروٹ وچ ہے
عباس برمانی
No comments:
Post a Comment
Note: only a member of this blog may post a comment.