ساکوں یقین ءِ جو بعد ساڈے وی آندا پل معاف نہ کریسے
کڈاہیں دھرتی دے غاصباں کوں نویں نسل معاف نہ کریسے
اے بے سہاگن غلام دھرتی دے گُنگے لوکو، جے نہ بولیسو
تہاکوں دھرتی دی کوئی سَسڑی تے کوئی پُنل معاف نہ کریسے
غلام لوکو! جے ہُن غلامی دے طوق نسلاں دے گل پویسو
تاں آون آلا کوئی مؤرخ تہاکوں کل معاف نہ کریسے
جنہاں وی پیتے اساڈا پانی، جنہاں وی ہے کھادا حق اساڈا
انہاں کوں روہی، دمان، سودھا اے تسا تھل معاف نہ کریسے
جنہاں وی معصوم خواہشاں دے نشوم خوابیں دا قتل کیتے
انہاں کوں آندی نسل کڈاہیں ایہو قتل معاف نہ کریسے
میں سچ الیساں تاں ڈھیر سارے مہاندرے تھی ناراض ویسن
جے سچ لُکیساں تاں میکوں میڈا ضمیر ول معاف نہ کریسے
جے شاعری وچ غیور دھرتی دے درد شامل توں نہ کریسیں
تیکوں تیڈی کوئی نظم، ڈوہڑہ اَتے غزل معاف نہ کریسے
غیور بخاری
No comments:
Post a Comment
Note: only a member of this blog may post a comment.