اساں تاں ازلاں توں بے رخی دے عذاب پلکاں تے چئی ودے ہیں
رُٹھے رُٹھے ہوئے نشیلے نیناں دے خواب پلکاں تے چئی ودے ہیں
سمجھ نی آندی طویل عرصے توں اے طلب ہے یا کوئی سبب ہے
سوال چہرے تے چپ کھڑے ہن، جواب پلکاں تے چئی ودے ہیں
یقین کائنی تاں ڈیکھ سگدیں توں خود فقیریں دا حال آ تے
جو تیڈے نکھڑنڑ دی ہک نشانی جناب پلکاں تے چئی ودے ہیں
جیکر بولیندوں نی بول سگدے اکھیں کھولیندوں نی کھول سگدے
حیاتی ساری دا بھار ہک بے حساب پلکاں تے چئی ودے ہیں
توں اپنڑے سوہنڑے نشیلے نیناں دے نال جیڑھی پلائی ہا وی
اساکوں لگدے جو اج توڑیں او شراب پلکاں تے چئی ودے ہیں
کئی ساڈیاں پلکاں تے اڑ سگیا نئیں تے دل دی دھرتی تے کھڑ سگیا نئیں
اساں تاں اج تئیں اونویں کنوارہ شباب پلکاں تے چئی ودے ہیں
اداسی ساڈی کوں لوک سارے پرے کنوں ہنڑ پچھانڑ گھندن
کئی اینویں لگدے جو مونجھ دا آفتاب پلکاں تے چئی ودے ہیں
کوئی ڈساوے ایہ ہے محبت؟ یا کوئی کرامت؟ یا معجزہ ہے؟
اساں خزاں وچ وی اوندے مُکھ دا گلاب پلکاں تے چئی ودے ہیں
اساکوں غیور ایں جہان ءچ توں جتنا رُسوا کریندیں کر گِھن
اساں تاں سئیں تیڈا عشق عزت مآب پلکاں تے چئی ودے ہیں
غیور بخاری
No comments:
Post a Comment
Note: only a member of this blog may post a comment.