سنیو اوئے مذھباں والیو
سنیو اوئے وطناں والیو
سنیو اوئے نسلاں والیو
اک آدم کِتے گواچیا
ہاڑا وے کدھرے بھالیو
اپنی کتاباں پھولیو
لفظاں دے معنی ٹولیو
مسجد نوں جاندا ویکھو
مندر چوں اوندا بھالیو
گرجے چ بیٹھا جا لیو
سنیو اوئے مذھباں والیو
دھرتی دی حداں ناپیو
اپنی حکومت ماپیو
بمباں دی کن من ویکھیو
سجن تے دشمن ویکھیو
ناڑاں تے ناڑاں ویکھیو
واڑاں تے واڑاں ویکھیو
ہتھاں چ جھنڈے ویکھیو
سینے تے تمغے والیو
سنیو اوئے وطناں والیو
اک آدم کِتے گواچیا
ہاڑا وے کدھرے بھالیو
بندیاں دے انگ وی ویکھیو
لہواں دے رنگ وی ویکھیو
باہمن تے سید ویکھیو
کمی تے شودر ویکھیو
پتر دا پتر لبھیو
باپو دا باپو بھالیو
سنیو اوئے نسلاں والیو
اک آدم کِتے گواچیا
ہاڑا وے کدھرے بھالیو
طارق گجر
No comments:
Post a Comment
Note: only a member of this blog may post a comment.