تاراں اتے پھل ٹکاۓ، ویکھ لوے
اوہنوں آکھو اودھروں آۓ ویکھ لوے
کہندا سی نہ میں لیکاں نوں مندا نی
ہن شیشے نوں جوڑ وکھاۓ، ویکھ لوے
کہندا سی ایہ عشق سمندر ہندا اے
ساحل تے ہن وَین نہ پاۓ، ویکھ لوے
مان بڑا اے جس نوں اپنے سجناں دا
اک واری اوہ کنڈ پرتاۓ، ویکھ لوے
واہگے تے تیار کھڑا اے جو مارن لئی
اک واری بس، چاچے تاۓ ویکھ لوے
رب اکٹھا کرنا طارق چاہندا سی
مندر مسجد گرجے ڈھاۓ ویکھ لوے
طارق گجر
No comments:
Post a Comment
Note: only a member of this blog may post a comment.