گھب گھب مٹی اے
چھا تیڈی کھٹی اے
مکھنڑ تیڈا پیلا اے
سونے دا نہیلا اے
گھب گھب مٹی اے
انڑ سونہی سہانونڑی
انڑ ڈٹھی ھنڈانونڑی
جاگ جاگ لانونڑی
کہیں کوں کیا ڈسانونڑی
رات کینویں کٹی اے
گھب گھب مٹی اے
جاگ وی خمار وی
یاد وی وسار وی
پیار وی وپار وی
جینویں آر پار وی
حیرتیں دی ہٹی اے
گھب گھب مٹی اے
ریت چپ چپاتی اے
جھمکدی حیاتی اے
صرف پل دی جھاتی اے
اونویں اونویں چاتی اے
جینویں جینویں کھٹی اے
گھب گھب مٹی اے
کوئی کتھاں وے سانولا
سر دی چھاں وے سانولا
ناں وے ناں وے سانولا
اساں تاں وے سانولا
تیڈی تانگھ سٹی اے
گھب گھب مٹی اے
عزیز شاہد
No comments:
Post a Comment
Note: only a member of this blog may post a comment.