کون تھی سگدے سانویں تیڈے
چندر چمدے پچھاویں تیڈے
ساڈی کنگھی وی شیشہ وی توں
اساڈے شیشے دی تصویر توں
ساڈی دھڑکن تے پہرا تیڈا
ساڈے پیریں دی زنجیر توں
اساڈے گل وچ گلانویں تیڈے،
تیڈے رستے تے جو ٹر پیوں
ساڈے پیریں تے پھل پے گئے
اساں دھرتی دے بے قیمتی
ساکوں خود اپنڑیں مل پے گئے
تھئے ہیں جہیں ڈینھ دے نانویں تیڈے
ساڈا پورا ترکہ وی توں
ساڈے چنتے تے گنڑ منڑ وی توں
کنڈوں رانڑیں فقیریں اتے
ترمدے سانوڑ دی کنڑ منڑ وی توں
کیا پتہ ہجر تیڈے اندر
کیں تونڑیں زہر پیندے اساں
تیڈا زخم وی نہ ہوندا جیکر
کیا خبر کیویں جیندے اساں
جیندے پئے ہیں پسانویں تیڈے
ساڈے چوپھیر مجمع وی توں
ساڈے اندر دی تنہائی توں
ساڈی تریہہ دا تماشا وی توں
ساڈا شاہد تماشائی توں
گیڑ سارے ولانویں تیڈے
کون تھی سگدے سانویں تیڈے
چندر چمدے پچھاویں تیڈے
عزیز شاہد
No comments:
Post a Comment
Note: only a member of this blog may post a comment.