آ سانول ٹھلدی ٹھل ڈیکھوں
من مونجھے ماندے مل ڈیکھوں
آ سانول ٹھلدی ٹھل ڈیکھوں
آ سانول ٹھلدی ٹھل ڈیکھوں
٭
ول اپنڑی لوئی لو ڈیکھوں
جو ہوونڑی اے سو ہو ڈیکھوں
کجھ اپنڑیں آپ اچ رو ڈیکھوں
کجھ اپنڑیں آپ اچ کھل ڈیکھوں
آ سانول ٹھلدی ٹھل ڈیکھوں
٭
چل چولوں چاک چنبیلیاں دے
ول گولوں سنگ سہیلیاں دے
رل کھولوں تاک حویلیاں دے
وچ وسدی اپنڑی گھل ڈیکھوں
آ سانول ٹھلدی ٹھل ڈیکھوں
٭
تیڈیں زلفیں وانگوں وہندی ہوئی
کوئی نمی نماشاں چھہندی ہوئی
نت سکدی جھوک تیں لہندی ہوئی
ول چڑیاں دی چل چل ڈیکھوں
آ سانول ٹھلدی ٹھل ڈیکھوں
٭
کوئ تانگھ طلب تس ترمدی ہوئی
کوئی سک ساہ ساہ توں سمدی ہوئی
تیڈے مکھڑے کھمنڑی کھمدی ہوئی
وچ کھمنڑی کھمدا تل ڈیکھوں
آ سانول ٹھلدی ٹھل ڈیکھوں
٭
عزیز شاہد
No comments:
Post a Comment
Note: only a member of this blog may post a comment.