ڈو پڑیاں
ہاۓ ہاۓ او ویلے نئیں بُھلدے
جڈاں تھگڑیاں بدھ کے کانے تے
بھاہ لیندے ہا سے کھکھریں کوں
جڈاں پہلی واری وستی وچ
بس ہارن آن وگایا ہا
اوں ساڈا مال ڈرایا ہا
جڈاں ٹوکرے لا کے ویہڑے وچ
کئی چلکدیاں چڑیاں نپ نپ کے
کوئی خاص نشانی لا ڈیونڑ
پُچھ پٹ کے انت اڈا ڈیونڑ
ہاۓ ہاۓ او ویلے نئیں بھلدے
او چِیک چہاڑا چُلہے تے
اے پہلی روٹی میں کھاساں
ایں گال تے رولے ہوندے ہن
جڈاں سکھنڑے چولے ہوندے ہن
جڈاں ہن خزانے پلو وچ
او لک چھپ لک چھپ کھیڈدیں ہوئیں
کڈی لوکڑاں نال کلوٹھی دے
کڈی طاق دے اوڈھر لک ونجڑاں
ساہ سک ونجڑاں
جڈاں پوہ دیاں لسیاں کھمڑیاں وچ
کوئی پینگھ فلک تک آوے ہا
ساڈے تاڑی پینگھ تئیں ویندی ہائی
او رات دی ما دے ڈر کولوں
ساڈا شام توں پہلے سم ونجڑاں
ہاۓ ہاۓ او ویلے نئیں بھلدے
او ویلے کیویں بھل سگدن
جڈاں آکھیا ہا اُستاد ساکوں
چلو تختیاں چاؤ، املا لکھنڑۓ
میڈی مَس کو نہیں، میں رُناں ہم
میڈی ہنج کوں پونجھ کے تیں سانول
ڈو پُڑیاں میکوں ڈتیاں ہَن
تیڈے ڈو پڑیاں میں ہالیں تئیں
مخمور قلندری ڈیونڑیاں ہِن
مخمور قلندری
No comments:
Post a Comment
Note: only a member of this blog may post a comment.