ککھاں لدی
روز نماشاں نِکّے ہُندیاں
بُکل وچ ولیٹ کے آکھے
گُھپ ہنیرا چنگا نہیں اے
کوڑھی تے اَنبھوندی پُترا
روز نماشاں ٹَپ کے کندھاں
ویڑھے دے وچ اوندی پُترا
لگے داء تے لا جاندی اے
نِکے بال نوں کھا جاندی اے
میں کیوں نکلن دیواں تینوں
رکھ بھروسہ ماں دے اتے
سئیں جا میری ہانہہ دے اتے
نالے ماں دی جھولی دے وچ
سُتے بال نوں کھاندی نہیں اوہ
ماں دے ہندیاں آندی نہیں اوہ
پر ایہہ گل اے اوس ویلے دی
جد ایہہ وتھاں پئیاں نہیں سن
میں ہن دھرتی اُتے وساں
اوہ ہن دھرتی تھلے
کتھوں لبھ لیاواں دسو
بُکل وچ لُکاون والی
شامو شام سواون والی
بھاویں گبھرو سارا ہاں میں
پر میں ڈردا سوندا نہیں ہاں
اونتر جانی آ نہ جاوے
ککھاں لدی کھا نہ جاوے
عاصم پڑھیار
No comments:
Post a Comment
Note: only a member of this blog may post a comment.