گل سُن نی اماں میرئیے
ایہ دُکھ نُکھٹے اونترے
ہوئے دھیاں نال جوان
مینوں ویڑھا کھاون آوندا
مینوں گھر لگے گستان
گل سن نی اماں میرئیے
میں کھیڈن نال سہلیاں
جد گھر چوں نکلاں باہر
مینوں جھاکے پوندے یار دے
مینوں ہک دے دسن چار
گل سن نی اماں میرئیے
میں سوہرے گھر نہیں جاونا
نہ کھڈی چاڑھیں کھیس
مینوں دھکا دے نہ امبڑی
مینوں رہن دے پیکے دیس
گل سن نی اماں میرئیے
میں بوہکر پھیری چونترے
تے ہُجھ بیٹھی آں لیکھ
میرے اندر بُھبھل اُڈدی
میرے اندر وڑ کے ویکھ
گل سن نی اماں میرئیے
مینوں چیتر چیتے بُھل گئے
رویا سینے لگ وساکھ
کیوں چُپاں وٹیاں ڈونگھیاں
مینوں کجھ تے مُونہوں آکھ
گل سن نی اماں میرئیے
جد سرگھی گھتیا ریڑکا
تے چاٹی کردی وین
میرے دل نوں سنھاں لگیاں
میرے چوری ہو گئے نین
گل سن نی اماں میرئیے
مینوں رحمت رب دی آکھدے
پر مُڑ وی مندڑا حال
رہ گئی آں دکھاں جو گڑی
لگ رونی آں کدھاں نال
گل سن نی اماں میرئیے
میرے اندر چنگاں پُھٹیاں
جیوں توے تے چڑھدی جنج
مُڑ عاصم اکھیں لُڑیاں
میری پُوچجھے کہڑا ہنج
عاصم پڑھیار
No comments:
Post a Comment
Note: only a member of this blog may post a comment.