اللہ میاں تھلّے آ
اپنی دنیا ویہندا جا
یا اسمانوں رزق ورھا
یا فِر کر جا مُک مُکا
اللہ میاں تھلے آ
تینوں دِھی ویاہنڑیں پیندی
نانکی چھَک بنانڑیں پیندی
رُسی بھین منانڑیں پیندی
لتھ جاندے سبھ تیرے چا
اللہ میاں تھلے آ
دھیاں نُوں تُوں جمنے دیندوں
کُڑماں دے تُوں طعنے سہندوں
نال شریکاں کدے نہ بہندوں
مٹی جاندی کپڑے کھا
اللہ میاں تھلے آ
تیرے گھر نہ دانڑیں ہُندے
پاٹے لیف پرانڑیں ہُندے
کملے لوک سیانڑیں ہُندے
پا دیندے تینوں گھبرا
اللہ میاں تھلے آ
تیرا کوٹھا چوندا رہندا
بھِجدا رہندوں اٹھدا بہندا
دِسدا نہ تینوں چڑھدا لہندا
اُگ پیندا ہر پاسے گھاہ
اللہ میاں تھلے آ
تیری ماں تے پیو نہ ہُندا
گھر وچ آٹا گھیؤ نہ ہُندا
جو تُوں چاہندوں اوہ نہ ہُندا
ویہندا وِکدی کِس کِس بھا
اللہ میاں تھلے آ
ویکھ شیعے تے وہابی لڑ پئے
سنی ڈانگاں لے کے چڑھ پئے
اک دوجے نوں قتل کریندے
آکھن ساڈا اک خدا
اللہ میاں تھلے آ
تیرے گھر لئی چندہ منگدے
ڈردے لوک نہ کولوں لنگھدے
سب نُوں گھر تے دے نہیں سکیا
اپنا گھر تے آپ بنا
اللہ میاں تھلے آ
نیک محمد کِدھر جاوے
روٹی رزق حلال کماوے
تیرا حکم تے طیب روزی
بن گیا اوہدے گل دا پھاہ
اللہ میاں تھلے آ
سائیں اختر لاہوری
سائیں اختر لہوری
No comments:
Post a Comment
Note: only a member of this blog may post a comment.