دل کردا اج کھائیے ساگ
وڈی دیگ چڑھائیے ساگ
نرم سرہوں دا گندلاں والا
آ جاؤ فیر پکائیے ساگ
پالک، دھنیا، ہریاں مِرچاں
باتُھو نال بنائیے ساگ
کچا چُلہا، کوری ہانڈی
چنگا گھوٹا لائیے ساگ
سَرگی دَھریا، شامِیں پکدا
تاں سوادی کھائیے ساگ
واہ وا سارا مکھن پا کے
روٹی اُتے لائیے ساگ
مَکی والی روٹی ہووے
کھائیے نال کھوائیے ساگ
کِدروں جے نہ لبھدا ہووے
پِنڈوں جا منگائیے ساگ
ایسا کوئی ویاہ وی ہووے
جہدے وِچ چلائیے ساگ
پنڈ چہ آ کے جے نہ کھادا
نال شہر لے جائیے ساگ
جیہڑا ساگ نوں مندا جانے
اونوں بدوبدی چٹائیے ساگ
بابا بلھا شوق نال کہندا
چھیتی لیا نی مائیے ساگ
باقی سالن بُھل جاون گے
روز جے تڑکا لائیے ساگ
مُرغے بے سوادے لگدے
کھانا جے بُھل جائیے ساگ
اے نہ چھڈِیں بُھل کے وی تُوں
دیس میرے دا ماہی اے ساگ
پیزے، تِکے، برگر چھڈ کے
دعوتاں روز اڈائیے ساگ
قاسم خش خش رہنا ہووے
اپنے گھار اُگائیے ساگ
قاسم سرویا
No comments:
Post a Comment
Note: only a member of this blog may post a comment.