ایہہ اخیر انجام ہوندا اے ایہو انت ہے پنگے دا
یاں رُقعہ متراں دے دلوں، یاں سنہیا دنگے دا
سجناں نے فر تھاں ٹھکانہ اپنا اوتھے چُکنا سی
پہلی چوکی تھانے دی سی، دوجا چوک لفنگے دا
ایہہ رنگ بے رنگ دے نیں ایہو بے ڈھنگیاں دے ڈھنگ
کیہ قسم بدمعاشاں دی، کیہ پاہرا ننگ ملنگے دا
ٹھیک اے پہلاں تھوڑی جہی خوراک ایہدی وی چنگی اے
دُدھ پتی تو پچھوں ایتھے دور چلے گا بھنگے دا
تھوڑ کسے دی تھوڑی نہ تے لوڑ کسے دی لوڑی نہ
ہک رگ وادھوں کانے دی تے ہک دا وادھا لنگے دا
چار چفیرالیک ریا اے بے علمی دے دھوکے وچ
کیہ معلوم قبول ہونا اے کیہڑا رنگ بے رنگے دا
جان تلی تے دھر کے ہن فیروز پورے ول تڑنا جے
ایہہ بیٹھک ہے دشمن دے گھر، ایہہ محاذ ہے جنگے دا
ایہہ گدکڑے تھوڑی دیر نیں، ایہہ پھڑکاوے دیگر تئیں
آ گیا کمہار تے آپے گھوڑا کھوتا ڈنگے دا
ہک نگارا ہے عیداں دا، ہک نعرہ امیداں دا
ادھی راتیں ساڈی دھڑکن دھمی ناد ملنگے دا
اقتدار جاوید
No comments:
Post a Comment
Note: only a member of this blog may post a comment.