امبر والا دھرتی دا جد میلا شیشہ دھووے
کداں مٹھی نیندر مانے، جیہدا کوٹھا چووے
غزلاں دی تھاں اج کل میں وی مرثیۓ لکھدا رہناں
اوہ مزدور آں قبر اپنی دے، جو خود پتھر ڈھووے
بندہ ہو کے جیون نالوں پتھر ہونا چنگا
میری ایہ فرمائش ہے، جے مڑ کوئی مٹی گووے
خورے اوڑک دیکھ لیا سُو چھالیاں توں وی پہلاں
واٹ میری کُرلاہٹ کرے تے کُونجاں وانگوں رووے
میرا جگ ہنھیر بنایا کالیاں زُلفاں والے
سوہناں یار منور ہویا، میرے دل دی لووے
سلطان کھاروی
No comments:
Post a Comment
Note: only a member of this blog may post a comment.