جیوندی موئی
جیوندا رہے وے جِین جوگیا
میتھوں پہلاں روٹی توں کھادی
میرے حِصے دا دُدھ وی پیتا
باپو نال میلے وی توں ویکھے
تیری جُتی آؤن تے
چاء مینوں چڑھنے
عبادت وانگوں تیرے لِیڑے دھوتے
ماں نے تیرا غُصہ وی میرے تے کڈھیا؟
توں شہر پڑھن گئیوں تے
پورا پورا ہفتہ تیری راہ تکی
تینوں سَٹ لگی تے پِیڑ مینوں ہوئی
تینوں گھر مِلیا تے مینوں دیس نکالا
تیریاں دم دم خیراں منگیاں
تینوں نِت نِت جِین دعاواں دِتیاں
جیوندا رہے وے
جیوندی نوں موئی لِکھوان والیا
ارشاد سندھو
No comments:
Post a Comment
Note: only a member of this blog may post a comment.