کلیاں بہہ کے خواب سجاندا رہنا واں
انج سدھراں دا مانڑ ودھاندا رہنا واں
آپ اُسار کے آپے ڈھاندا رہنا واں
کھوہ دی مٹی کھوہ وچ لاندا رہنا واں
اوہ آوے نہ آوے اوہدی مرضی اے
میں آساں دے دیپ جلاندا رہنا واں
اکلاپے دی اگ بجھاون دی خاطر
اکھاں وچوں نِیر وگاندا رہنا واں
اوہنے اپنے سارے قول نبھانے نے
دل کملے نوں اِنج سمجھاندا رہنا واں
جیہڑیاں راہواں اوہنوں چنگیاں لگدیاں سن
میں اوہناں تے آوندا جاندا رہنا واں
پھگن چیتر اوس نے پھیرا پانا ایں
اپنے آپ نوں میں پرچاندا رہنا واں
یوسف خالد
No comments:
Post a Comment
Note: only a member of this blog may post a comment.