عشق، محبت، پیار وے اَڑیا
تُوں میرا سنسار وے اڑیا
کدی تے کہہ دے ہار گیا واں
کدی تے من لے ہار وے اڑیا
تیرے پِچھے جِندڑی رُل گئی
ہو بیٹھی آں خوار وے اڑیا
تیری خاطر جگ نُوں چهڈیا
تُوں نہ چهڈ وچکار وے اڑیا
تیرے بعد وی ویکھ لیا میں
سب دا سب بیکار وے اڑیا
تیرے نال ای چلدا میرے
ساہ دا کاروبار وے اڑیا
اِکو واری مار مُکا دے
گهڑی مُڑی نہ مار وے اڑیا
عالیہ شاہ
No comments:
Post a Comment
Note: only a member of this blog may post a comment.