ہو گئی کِنی دیر بھرا جی
پر نہیں مُکیا نھیر بھرا جی
سو دا چوتھا حِصہ کوئی نہیں
پونے رہ گئے سیر بھرا جی
تیراں دے نل وِنھے گئے جد
اُتوں آ گئے شیر بھرا جی
کھانے نہیں سن جس بیری دے
کھانے پَے گئے بیر بھرا جی
ایہناں نے ای بھیس وٹا کے
آ جانا جے فیر بھرا جی
جے ٹھوہیاں توں جان چھڈائیے
سپ لیندے نیں گھیر بھرا جی
زبراں، پیش نہ جاون دِتی
جاندی کتھے زیر بھرا جی
ارشاد سندھو
No comments:
Post a Comment
Note: only a member of this blog may post a comment.