ہنساں اُتے کاواں دی سرداری نوں
روکو جگ تے کِھلری ایس بیماری نوں
پک وی ہووے کچے پار لنگھاؤندے نہیں
پُچھ لے جا گجرات دی اک کمھیاری نوں
رہندا اے دُھوں نھیر جہیا چوبارے تے
سجناں کیتا بند جدوں دا باری نوں
چج دے رُکھ تے بندیاں نے ای چھڈنے نہیں
لیکھا ایویں لئی پھرنا ایں آری نوں
سُنیا اے میں سجن ویچن لگ پئے نیں
لوکیں کاروبار بنا کے یاری نوں
لہنا کوئی نہیں چھڈدا تاں تے بندا وی
موڑ رہیا اے اک اک ساہ اُدھاری نوں
سجن ٹر پئے رکھ کے ہتھ کلیجے تے
دُور کھلوتے تکدے رہ گئے لاری نوں
اوڑک سندھو اوہیو کجھ وی چھڈدے نہیں
جِنا پچھے چھڈئیے دنیا ساری نوں
ارشاد سندھو
No comments:
Post a Comment
Note: only a member of this blog may post a comment.