دُکھ دریا سمندر بن گئے، ٹُٹے سبھ سہارے
آساں نوں انج ڈھاواں لگیاں، کھر کھر گئے کنارے
ہن تے دل وچ کدھرے وی کوئی، آس امید نہیں وسدی
اک اک کر کے بُجھے آخر، ایہہ سبھ نور منارے
لکھ کروڑاں پُتر ہُندیاں، رُلاں میں کلم کلی
بیلے وچ اک مائی کھلوتی، رو رو پئی پکارے
حرف وچارے اڈیاں چک چک ایدھراودھر دیکھن
خون دا وتر لاوے کہڑا، سانوں کون پکارے؟
اپنی جان تلی تے دھر کے، چھاتی تان کھلووے
ماں بولی تے پہرہ دیوے، کوئی نہ پتھر مارے
چِر ہویا اے دھرتی اُتے رونق میلہ لگیاں
آ جا سُولی چڑھکے نچیۓ، دیکھن لوک نظارے
جو کجھ کرنیں اج ہی کر لے، کل کسے نہیں دیکھی
اوڑک اک دن وج جانے نے عاشق کوچ نگارے
عاشق لاہوری
No comments:
Post a Comment
Note: only a member of this blog may post a comment.