پنجابی پوٹھواری پوٹھوہاری پہاڑی شاعری
کِیّاں پُکھے بیٹھے آں
کسِ نے بُوئے بیٹھے آں
پُکھ نی مرنی اکھیاں نی
پیٹوں رَجّے بیٹھے آں
گل کرنے تیں سچیاں نی
سارے چُوٹھے بیٹھے آں
ہوئی گے دشمن جنھاں نال
عرصہ کَھلتے بیٹھے آں
کس کی دُکھڑے دَسنا ایں
درداں مارے بیٹھے آں
اِتھے حق نی گل نہ کر
اِتھے ڈورے بیٹھے آں
وَٹ دسنے اے متھیاں نے
کٹھیاں سکے بیٹھے آں
تاڑیاں مننی مننی تے
آپوں رُلے بیٹھے آں
زیویں تھلّے وی جانڑاں
اُپر جیڑے بیٹھے آں
سن نا طعنے لوکاں نے
تک نا کلے بیٹھے آں
کل وی اُجڑے بیٹھے ساں
اج وی اُجڑے بیٹھے آں
ہُن مُڑی وی اچھ باسط
تاڑے رستے بیٹھے آں
باسط علی حیدری
No comments:
Post a Comment
Note: only a member of this blog may post a comment.