میں تینوں نئیں بُھلیا قسم اے
قسم اے میں تینوں نئیں بھلیا
قسم اے
تختی گاچی قلم دوات
دونی آلے پہاڑے
تے تیرے بستے دی
میں تینوں نئیں بھلیا
قسم اے
لویا لیلن چھان ٹُکر
اڈی آلی جُتیاں
تے مِٹھے امروداں دی
میں تینوں نئیں بھلیا
قسم اے
بیلچے گینتی تیسی
فومی گرمالے
تے کانڈی آلے سیمنٹ دی
قسم اے
پان اِٹ چِڑی حکم
تے حکم آلے گولے دی
میں تینوں نئیں بھلیا
قسم اے میں تینوں نئیں بھلیا
قسم اے
ست چوکے ٹھائی
نو پانجے پنتالی
تِن چھیکے اٹھارہ تے
اٹھو آٹھے چونٹھ دی
قسم اے
آؤ باؤ ماریا چاقو
تے کڈھے لہو دی
قسم اے
پوانداں سرہنداں سیروُ پاوے
تے پاوے چ لگی چُول دی
میں تینوں نئیں بھلیا
قسم اے
قسم اے میں تینوں نئیں بھلیا
قسم اے
گلی ڈنڈے لُکن میٹی
گیند بلے شٹاپو
تے نشانے آلے بانٹے دی
قسم اے
ساون بھادوں اسو کاتک
تے پوہ آلی جپھی دی
قسم اے
دوانی چوانی اٹھانی پنجو
تے روپیے آلی ٹافی دی
قسم اے
کیپٹن مارون ڈن ہل کسان
تے گولڈ لیف آلے بابے دی
میں تینوں نئیں بھلیا
قسم اے میں تینوں نئیں بھلیا
قسم اے
یسو پنجو ہار کبوتر
تے ہیر آلی ڈولی دی
قسم اے
چمٹے پھوکنی توے چنگیر
اماں تے اماں دے ڈوپٹے دی
میں تینوں نئین بھلیا
قسم اے
قسم اے میں تینوں نئیں بھلیا
قسم اے
جوار باجرہ شٹالہ کنک مونجی
مکئی آلی چھلی
تے چھلی آلے والاں دی
میں تینوں نئیں بھلیا
قسم اے میں تینوں نئیں بھلیا
میں تینوں نئیں بھلیا
قسم اے چُوڑیاں خشبواں
سُرخیاں عیداں شبراتاں
تحفے آلے بھالُو
تے بھالُو اُتے لکھے
آئی لو یو دی
قسم اے
آئی لو یو ٹُو
میں تینوں نئیں بُھلیا
میں تینوں نئیں بھلیا
قسم اے میں
تینوں نئیں بھلیا
سہیل کاہلوں
No comments:
Post a Comment
Note: only a member of this blog may post a comment.