جِسلے سورج رات دی بانہہ پھڑدا اے، چن چڑھدا اے
جیوں انبراں تے ماجھا دُدھ کڑھدا اے، چن چڑھدا اے
جد اوہ سجرا سک ملدا اے، پورا جگ بلدا اے
تے فر جو بُلھیاں نوں رنگ چڑھدا اے، چن چڑھدا اے
میں تکیا اے اکھاں میٹ کے پورا پِنڈ ای جِتھے
چھاں نوں دُھپ تے دُھپ نوں چھاں پڑھدا اے، چن چڑھدا اے
ایہ گل لکھ کے رکھ لئو حِرصی ہوسی ذہناں نوں جد
بد نِیتی دا کالا سپ لڑدا اے، چن چڑھدا اے
جِہڑے تھاں تے پُجدی سردی واء دے وچ کسے دا
رُکھاں ہیٹھ وی جا کے سِر سڑدا اے، چن چڑھدا اے
کل وی جِہندا جِِتھے نونہ اڑدا سی، چن چڑھدا سی
اج وی جِہندا جِِتھے نونہ اڑدا اے، چن چڑھدا اے
سندھو اپنی سوچ تے اپنی اپنی لوڑ مطابق
جد کوئی اپنا اپنا رب گھڑدا اے، چن چڑھدا اے
ارشاد سندھو
No comments:
Post a Comment
Note: only a member of this blog may post a comment.