اساں دیوا بالیا اے
چاننے کھڑیجیاں دا
دُھپاں چ مدھیجیاں دا
بانہواں چ لُکاونا سی
کِنے سینے لاونا سی
چیکنے جہے موسماں چہ
ریتلا سریر جی
ندیاں نوں پانیاں نے
کیتا اے فقیر جی
لولھیاں لنگیریاں توں
ایدکاں وی نھیریاں توں
لُٹے گئے نیں بیلیاں چہ
رسماں دے میلیاں چہ
کِسے دا کوئی رانجھنا تے
کسے دی کوئی ہیر جی
ندیاں نوں پانیاں نے
کیتا اے فقیر جی
جمے ہوئے شرینیاں چوں
رُتاں دُدھاں پینیاں دے
مٹھے مِٹھے ہاسیاں دی
ایتھے کئی پتاسیاں دی
کھوہی کِویں موہریاں نے
کھنڈاں جہی تاثیر جی
ندیاں نوں پانیاں نے
کیتا اے فقیر جی
غزلاں تے نظماں دا
ہمتاں تے عزماں
آوندے دیہاڑیاں لئی
مھاتڑاں تے ماڑیاں لئی
اساں دیوا بالیا اے
ہو کے لیرو لیر جی
ندیاں نوں پانیاں نے
کیتا اے فقیر جی
ارشاد سندھو
No comments:
Post a Comment
Note: only a member of this blog may post a comment.