عورت
کر کر باری بَوکر ویکھی پانڈے مانجھ وکھائے نیں
آٹا گُنہیاں مُکیاں دے دے پُھلکے گول پکائے نیں
پانی وی میں کُھوں توں بھریا بستر چاڑھے کوٹھے تے
داؤناں کَسیاں لیف لگندے روندے بال کھڈائے نیں
چھتی تے پڑچھتی جھاڑی ٹاکی ماری بوویاں نوں
کندھاں کوٹھے لِپ لِپ کے میں چاندی وانگ بنائے نیں
دیوے دی میں لووے بہہ کے چکی پیسی لوڑاں نوں
پُونیاں کت کت سُٹی جاواں چرخے دب چلائے نیں
فاقے کٹے، ماراں کھادیاں، جسم تڑایا، بندے توں
بابل ویکھ کے ویہڑے وڑھدا منہ دے نیل چھپائے نیں
چھڈ کے ویہڑا بابل دا میں جس دا پلو پھڑیا سی
اکھاں چوں اُس نیر وگایا ماں پے قبرے پائے نیں
سارے کیہندے تُوں کی کیتا ویلی اَکی کاری نے
ویکھو لوکو! رب نے میرے کیسے لیکھ بنائے نیں
الیاس عاجز
No comments:
Post a Comment
Note: only a member of this blog may post a comment.