تینوں یاد اے؟
پنڈ دے بالکل مرکز دے وچ اک بوڑھ ہوندی سی
او کٹی گئی اے
یاد ای پنڈ دے اوس سرے اک پپل سی
آہو او ای وڈا پپل، او ڈھے گیا اے
یاد اے تینوں اس پپل تے عید ورینے پینگ پیندی سی
ہُن نئیں پیندی
اوس پینگ تے پنڈ دے سارے وڈے نکے کٹھے ہو کے
آ ملدے سن، ہُن نئیں ملدے
بالک گھبرو جٹیاں ناراں پینگ بہانے
آ رلدے سن، ہُن نئیں رلدے
ایہہ سب تک کے میں جئے بالک تاڑیاں مار کے
کھڑ پیندے سن، ہُن نئیں کھڑدے
یاد ای فر اک واج آؤندی سی
سب دیاں ماواں بالکاں دے لئی
کھیراں چاڑھ بلاؤندیاں سن
مٹھی کھیر دی مٹھی واج کنی پیندی سی
نس پیندے ساں، ہُن نئیں نسدے
ہُن اوہ واج کنی نئیں پیندی
کیوں نئیں پیندی؟ کی ہویا اے؟
بوڑھ کٹ گئی، پپل ڈھے گئے، پینگ ترٹی
سب سہہ گئی آں میں
سب مندی ہاں
پر اوہ کھیر دی واج کدھر گئی
ماں نوں لبھاں، کی کہندا ایں؟
اج دیہاڑے مر گئی سی اوہ
چل وے بیبا
جھوٹ نہ تولیں
ایہہ انہونی کیویں میں مناں
میں نئیں مندی، میں نئیں مندی
تینوں یاد اے؟
فرح گوندل
No comments:
Post a Comment
Note: only a member of this blog may post a comment.