ہاڑ مہینہ
بوڑھ دی چھاویں
ڈٹھا موٹے وان دا منجا
ٹھنڈی مٹھی واء دے بُلے
وان دے منجے اتے بیٹھے دو تِن بابے
واری واری حقے دے پئے سوٹے لوندے
گلاں کردے، اک دوجے نوں ہیر سنوندے
باتاں پوندے
میں تے میرا سجن عابی
کچھے پا ٹِبیاں والے ٹوول تے جاندے
کھاڈے دے وچ چُبھیاں لاندے،غوتے کھاندے
کھالے دے نال ٹاہلی دے بوٹے تے چڑھ کے
پُونڈ لڑاندے، منہ سُج جاندے
اوتھوں سدھے وٹو وٹی پِنڈ نوں جاندے
بیری دا اک ٹِہن ہلا کے بیر سی کھاندے
سیکل قینچی مار نساندے، سَٹّاں کھاندے
شام نوں وانجو، پٹھو کیرم کھیڈن جاندے
مِٹیو مِٹی کرکے کپڑے گھر نوں آندے
اک دوجے نال دِل دیاں گلاں کردے جاندے
گارے مٹی دے نال لِپے، کندھاں کوٹھے
نال چھتیری اتے پائی چھت کاہنے دی
اوس دے اتے ریجھ ناں پھیری توڑی مٹی
کچے ویہڑے دے اک پاسے بالن، چُلھا
نال توی تے دوٹیاں تھلدی تائی میری
پیڑے کردی بیٹھی اے ماں جائی میری
چُلھے اتے ساگ پکوندی مائی میری
ساگ نوں لایا ماں نے دیسی گھیو دا تڑکا
روٹی اتے ریجھ ناں لایا تازہ مکھن
نال ای رکھ دتّی ٹھنڈی، چاٹی دی لسی
سِر تے میرے پھیر کے ہتھ ماں آکھن لگی
روٹی کھا لے میرا سوہنا میرا پُتر
پہلی بُرکی پوندیاں ای اکھ کھُل گئی میری
دل دے وچ اک ٹیس اُٹھی کہ سُفنا سی ایہہ؟
سورج چڑھدے تک میں ایسے سوچیں ڈُبیا
ٹُر گئے لوک سیانے، لے گئے دور پُراناں،
کدھرے وی اوہ بوڑھ دی ٹھنڈی چھاں نئیں لبھدی
تن وی، دھن وی وار اسد پر فائیدہ کوئی نئیں
ٹُر جائے اک وار، دوبارہ ماں نئیں لبھدی
اسدالرحمٰن ڈوگر
No comments:
Post a Comment
Note: only a member of this blog may post a comment.