گنجھل وانگر کُھل جاواں گا
نھیری وانگر جُھل جاواں گا
میں ویلے دا ڈونگھا ناول
ورقہ ورقہ تُھل جاواں گا
سارے جگ نوں سرتاں دے کے
سفنے وانگر بُھل جاواں گا
میری ہستی ست سمندر
قطرہ قطرہ ڈُھل جاواں گا
میں پیاراں دا سچا گہنہ
ککھاں نال وی تُل جاواں گا
کنڈیاں دا میں ساتھ نہیں دینا
پُھلاں دے سنگ رُل جاواں گا
قمر میں خوشبو دا اک بدّل
دھرتی دے وچ گُھل جاواں گا
شوکت علی قمر
No comments:
Post a Comment
Note: only a member of this blog may post a comment.