چھیویں حِس دی خبر جہی اے
اوہدی دل تے نظر جہی اے
مِٹھیاں مِٹھیاں مُسکاناں نے
دل وچ پنڈ دی فجر جہی اے
اتھرو، چیکاں، ہوکے، ہاوے
دل دی حالت حشر جہی اے
راتیں لگدے روندے رہے او
گلھاں تے کجھ لسر جہی اے
ہونٹھ تے اوہدا ناں آیا اے
منہ وچ کھنڈ تے شکر جہی اے
پینڈے، دھوڑاں، ٹھیڈے، سُولاں
جِندڑی دُکھ دا سفر جہی اے
سُکھ دے ناں تے دُکھ ملدے نے
عدل دی صورت، جبر جہی اے
بندے برف دے باوے لگدے
دنیاں اُجڑی قبر جہی اے
سچ دی راہ تے یار قمر جی
خوف دے جادو نگر جہی اے
شوکت علی قمر
No comments:
Post a Comment
Note: only a member of this blog may post a comment.