بھاگ بھری اس مٹی نوں اکسیر بناون والے
سُتے پئے نیں دھرتی دی تقدیر جگاون والے
ہُن نہ بُڈھڑے بوہڑاں تھلے رونق میلے لگدے
ہُن نہ دِسدے وارث شاہ دی ہیر سناون والے
ماں بولی پنجابی دا اے چہرہ بُجھیا بُجھیا
کتھے گئے او خواباں دی تصویر وکھاون والے
اک دوجے ول ویکھ رہے نیں لے کے پھٹّڑ جُثے
گئے سمے وچ اسماناں ول تیر چلاون والے
مینوں پک اے اک نہ اک دن ہنبلاں مار اُٹھن گے
نُکراں دے وچ مُنہ دے دے کےنیر وگاون والے
کیہ اے جے اس بارے سارے کٹّھے بہہ کے سوچن
بشریٰ من موہنی بولی دے پیر سداون والے
بشریٰ ناز
No comments:
Post a Comment
Note: only a member of this blog may post a comment.