اوتھے تیری کہڑی گل اے میری کہڑی گل اے
جتھے لوکی آکھن چھڈو رب دی کہڑی گل اے
ویسے تیرے کولوں میں کوئی اوہلا تے نئیں رکھیا
کلی ہسدی رہنی ایں توں ایسی کہڑی گل اے
پہلی گل اے اینج کوئی تیرے کلے نال نی ہویا
ہووے وی تے فیر جہانوں وکھری کہڑی گل اے
شالا راضی وسیں جہڑی تھاویں جا کے وسیں
میں تے دھکے کھاندا رہنا میری کہڑی گل اے
ناں ناں لوکاں دی ناں منیں تینو چھڈیا جاندا اے؟
جو آکھیں گی او ہووے گا ایڈی کہڑی گل اے
کدھرے ٹبے ٹیلے جے کر کلا مینو مل جائیں
فیر میں تینوں دساں ربا کہڑی کہڑی گل اے
اپنا دس توں عصمت کہڑی بھاروں معنے دینا ایں
اوہ تے کجھ وی کہہ سکدی اے اوہدی کہڑی گل اے
عصمت اللہ سیکھو
No comments:
Post a Comment
Note: only a member of this blog may post a comment.