شیطاناں دے ڈنگے تھلے آ گئے نیں
کتھوں دے باشندے کتھے آ گئے نیں
چھالے دَل کے ایتھوں تیکر پہنچے آں
سوکھے دن کی ایڈے سوکھے آ گئے نیں
اکھاں پورا فیدہ چکیائے موقعے دا
حضرت دل وی پچھے پچھے آ گئے نیں
بنیا کیہہ اے ایہو سوچی جانے آں
تیرے کملے کہڑے پاسے آ گئے نیں
شالا خیری دُکھاں دا اے لاہنگا نئیں
بسم اللہ پر ایدھے کدھے آ گئے نیں
نسو نوحؑ دی کشتی واجاں دیندی جے
پجو اپنے بیجے اگے آ گئے نیں
عشقا توں وی وِڈن وِڈنوں مُڑدا نئیں
مُڑ جا ہُن تے مینوں چِٹے آ گئے نیں
ویکھو عصمت ایہہ جے میوہ صبراں دا
سارے غلے یوسفؑ ہتھے آ گئے نیں
عصمت اللہ سیکھو
No comments:
Post a Comment
Note: only a member of this blog may post a comment.